Uko Katabarwa akomeje kuzamura ibendera ry’u Rwanda muri sinema ya Amerika

Mu gihe gishize byari bigoranye cyane kubona Umunyarwanda ukina muri filime ku rwego mpuzamahanga nka za Hollywood muri Leta Zunze Ubumwe za Amerika, Janvier Katabarwa ni umwe mu besheje ako gahigo kuko amaze igihe ari umwe mu bakinnyi ba filime babigize umwuga.

Mu gihe gishize byari bigoranye cyane kubona Umunyarwanda ukina muri filime ku rwego mpuzamahanga nka za Hollywood muri Leta Zunze Ubumwe za Amerika, Janvier Katabarwa ni umwe mu besheje ako gahigo kuko amaze igihe ari umwe mu bakinnyi ba filime babigize umwuga.

 

Uyu musore wavukiye mu Ntara y’Amajyepfo mu karere ka Nyamagabe mu 1985 aherutse kugaragara mu yitwa ‘Bulletproof’ yahuriyemo n’ibyamamare muri sinama nka Vinnie Jones, James Clayton itunganywa na Lions Gate.

 

Ubu Katabarwa aba muri Canada, igihugu yagezemo agiye kwiga Kaminuza afite imyaka 19. Akaba amaze imyaka 7 ari mu ruganda rwa sinema muri Canada na Amerika.

 

Uretse kugaragara muri ‘Bulletproof’, yagize uruhare muri filime yitwa Deadpool 2 ya David Leitch.

 

Mu rugendo rwa sinema Katabarwa yafashijwe n’abantu batandukanye barimo umunya-Thailand Iko Uwais bahuye mu 2019 amwigisha imikino njyarugamba n’imirwanire muri filime n’ibindi.

 

Uyu Iko Uwais yakinnye muri filime zitandukanye nka The Raid Redemption, Wu Assassins , Triple Threat n’izindi.

 

Mu kiganiro cyihariye yagiranye na IGIHE, Katabarwa yavuze byinshi ku rugendo rwe muri sinema , uko yaretse akazi akiyegurira sinema, ibyo atekereza kuri sinema nyarwanda n’ibindi.

 

Janvier Katabarwa avuga ko yavuye mu Rwanda ari umukinnyi w’ikipe y’igihugu ikina karate, yitabiriye amarushanwa atandukanye y’akarere ka Gatanu (Zone 5) n’ibindi.

 

Katabarwa gukona filimi yabihisemo nk’umwuga umutunze yemeza ko anahembwa neza ari nabyo byari indoto ze.Ati“Kera nshaka kwinjira muri sinema nabibwiye abantu bamwe bumva ari ibintu ntageraho banca intege, cyane ko kera twumvaga ari ibintu by’abanyamahanga, njye nkavuga ko nzabikora bakambwira ko ndi umusazi .”

 

Yongeyeho ati “Ndibuka nkiri muri Kaminuza i Butare n’aho nari ntuye i Gikondo, hari abo twabanye banyibutsa uburyo nabibabwiraga mvuye kureba filime nkababwira ko nzakora iyanjye nk’iriya.”

 

Uyu musore watangiye gukina karate afite imyaka 11, yayoboye imirwanire n’imyitwarire y’abakinnyi muri filime zitandukanye cyangwa usimbura abakinnyi ahantu hagoranye (Stunt Man).

 

Filime yakozemo iki gikorwa zirimo Peacemaker, Arrow , Superman Lois , The Flash, Super girl n’izindi.

 

Yavuze ko nk’umuntu winjiye muri sinema y’igihugu gikomeye nka Canada, byamusabye igihe kinini cyo kwimenyereza no kumenywa.

 

Ati “Ntabwo uza ngo uhite utangira gukina filime bisanzwe kuko ntabwo biba byoroshye. Nakoze kuri filime nto zitandukanye, niga gutoza abakinnyi muri filime , erega n’abandi bakinnyi bakomeye ubona usanga bafite ababigisha uko bitwara muri filimi.”

 

Yavuze ko kuba yaratangiye gukina afite ubumenyi muri Karate, byamworohereje cyane kuko hari aho ubwo bumenyi bwifashishwa kandi bugatanga umusaruro.Ati“Biragufasha kuko hari aho usanga umukinnyi mukuru atazi kurwana akaba ari wowe ubikora n’ibintu bigira amafaranga menshi kuruta kugaragara gusa umwanya muto muri filime, kandi mbifata nk’ishuri nanyuzemo kugera ngo ngere aha.”

 

Uyu musore yatangiye gukina ikinamico akiri umwana muto mu mikino yategurwaga na AERG (Umuryango w’abanyeshuri barokotse Jenoside yakorewe Abatutsi) binyuze mu itorero Inyamibwa yigeze no kuyobora.

 

Nubwo yize icungamari muri Kaminuza, byamusabye kureka akazi yari amazemo imyaka itatu akora mu ruganda rukora ibikomoka kuri peteroli muri Grande Prairie i Alberta yerekeza mu mujyi wa Vancouver kugira ngo agere ku nzozi ze.

 

Ati “Narize mfite impamyabumenyi zitandukanye mbere y’uko nza hano nakoze akazi mu ruganda rutunganya petoroli muri Alberta. Ni akazi kampaga amafaranga menshi ariko narakaretse niyigegurira sinema abantu baravuga bati uyu muntu ni umusazi.”

 

Muri Gicurasi mu 2017 Katabarwa yavuye i Alberta yerekeza mu mujyi wa Vancouver, aho nyuma y’ukwezi kumwe yahise aba umunyamuryango wuzuye w’ishyirahamwe ry’abakinnyi ba sinema muri Canada, ACTRA The Alliance of Canadian Cinema, Television and Radio Artists ubu rifite abanyamuryago 25,000.Katabarwa avuga ko nyuma yo kubona hari umubare muto w’abanyarwanda n’abanyafurika bayobora filime zivuga ku nkuru z’iwabo,, biri mu byamuteye kwihatira kwiga ibijyanye na sinema.

 

Ati“Bimwe mu byanteye kujya muri sinema nashakaga kujya nerekana amateka yacu , intwari zacu kuko iyo abanyamahanga babidukoreye bayavuga uko bashaka. Mwarabibonye bakora za Hotel Rwanda, bafata umuntu bakamugira intwari n’ibindi, ibi ntabwo byaba ari twe tubyikoreye, tubyikoreye bikabasha kugera kuri Netflix na AmazonPrime n’ahandi nibwo babona neza ukuri kwacu.”

 

Imishinga Katabarwa afitiye sinema yo mu Rwanda

 

Janvier Katabarwa yiyemeje kugira uruhare mu kuzamura urwego rwa sinema nyarwanda dore ko hari ibikorwa yari yatangiye kuhakorera ubwo aheruka mu Rwanda muri Gashyantare 2022.

 

Icyo gihe yagize ibyago yibwa amashusho yari ku mushinga wa filime yari yahurijemo abakinnyi ba filime bo mu Rwanda n’abanyamahanga ariko ntibyamuciye intege.

 

Katabarwa afite gahunda yo kugaruka mu Rwanda mu ntangiro z’umwaka wa 2023 agasoza umushinga bari batangiye.

 

Yashinze sosiyete Katabarwa Production ahuriyeho na mushiki we, izajya ikorera filime mu Rwanda no mu mahanga.Ati “Hari filime ndimo gutegura irimo abanyarwanda baba inaha muri Canada, hari n’iyo nzaza gukorera mu Rwanda binyuze muri Katabarwa Production. Ikintu kizanshimimisha ni ukubona abandi bana bava mu Rwanda bazamuka bakagera cyangwa bakarenga aho njye ngeze ubu.”

 

Katabarwa avuga ko ubu hari gahunda yo guhuza abanyarwanda n’abanyamahanga b’abahanga muri sinema bakungurana ibitekerezo byanashoboka bagahurira muri filime imwe.

 

Yavuze ko nyuma yo kumenya amateka y’u Rwanda n’ikuguzi byasabye ngo rubohorwe, yiyemeje kugira umusanzu atanga mu iterambere ryarwo.

 

Ati “Nagize amahirwe yo kumenya amateka y’igihugu cyanjye nkomokamo, menya uko abasore n’inkumi bitanze bakagera aho bamena amaraso ngo babohore u Rwanda, nanjye nk’urubyiruko numva mfite umwenda wo kugira icyo nkora, nishimira cyane kubona ukuntu u Rwanda rutera imbere kubera Intwari zabiharaniye, tugomba kubikomeraho niyo maraso atemba mu mubiri wanjye.”

 

Uyu musore asaba abashoramari gushora imari muri sinema nyarwanda mu rwego kwirinda ko haza umushoramari uvuye mu mahanga agakora ibyo yishakiye ku mateka y’u Rwanda.Katabarwa avuga ko u Rwanda rufite amateka yavamo filime zitandukanye kandi zigakundwa ku rwego mpuzamahangaKatabarwa afite intego yo gushyira itafari ku iterambere ry'u Rwanda anyuze muri sinemaKatabarwa amaze kumenyekana muri sinema aho yitabazwa muri filime zitandukanyeImyitozo afite muri Karate imufasha gushyira mu bikorwa akazi ke ka buri munsiKatabarwa yatangije sosiyete ya sinema izamufasha gushyira mu bikorwa inzozi ze


Bizimana Thierry

524 Blog posts

Comments