news of soort

Amavubi azira iki mukibug cyaruhago?

01:06:54 IGIHE NETWORK KN KINYARWANDA EN ENGLISH FR FRANCAIS

Amavubi azira iki?

Yanditswe na Iradukunda Olivier
Kuya 11 September 2022 saa 12:43
twitter sharing button
facebook sharing button
gmail sharing button
telegram sharing button
whatsapp sharing button
 Yasuwe : 
 

 

Umupira w’amaguru ni umwe mu mikino ikunzwe cyane ku Isi, ahanini abafana bakawukundira ibyishimo ubaha bitewe n’uko amakipe yabo yitwaye.

 

Mu Rwanda naho uwo mukino ntiwasigaye inyuma kuko uri mu yigaruriye imitima ya benshi, ariko bamwe basa n’ababihiwe iyo bigeze ku Ikipe y’Igihugu y’Umupira w’Amaguru, Amavubi.

Haba muri shampiyona cyangwa mu Ikipe y’Igihugu, ibitego bisa nk’ibyarumbye kandi ni indwara imaze igihe kinini, mu gihe ibitego ari rwo rufunguzo rw’ibyishimo by’abafana no gutera imbere k’uwo mukino.

U Rwanda rufite abasore nk’abandi, rukagira ibibuga, amafaranga buri mwaka aratangwa ngo umupira w’amaguru utere imbere ariko umusaruro mu kibuga ukomeza kuba muke cyane.

Ku mibereho y’abakinnyi ukoze ijanisha, ntabwo abo mu Rwanda wasanga ari bo babayeho nabi ku Isi, cyangwa mu Karere uhiniye hafi. Ariko se bipfira he? Kuki ibitego bitaboneka?

Mu myaka itanu ishize, nibura abakinnyi bagera ku icumi, bahamagarwa mu Ikipe y’Igihugu baturutse hanze, ariko umubare wiganza cyane ni abugarira kurusha abakinnyi bataha izamu.

Ibi bituma mu mikino mpuzamahanga u Rwanda rwakinnye kuva mu mwaka wa 2017 kugeza ku mikino rumaze gukina mu 2022, ibitego rwatsinze biri hasi y’imikino rumaze kwakira.

Muri iyo myaka itanu, Ikipe y’u Rwanda imaze gukina imikino 42. Muri iyo yose yatsinze ibitego 38. Muri byo, ibyatsinzwe na ba rutahizamu ni 18 mu gihe ibitego 12 byinjijwe n’abandi. Imibare yerekana ko ibyinshi byabonetse mu mikino ya gicuti.

Kuva mu mwaka wa 2017, u Rwanda rwakinnye imikino 35 utabariyemo iya gicuti. Muri yo rwatsinze imikino irindwi, runganya 13, indi yose rurayitakaza.

Umukinnyi uheruka gutsindira ibitego byinshi Ikipe y’u Rwanda ni Karekezi Olivier, watsinze ibitego 24 kugeza ahagaritse gukinira Ikipe y’Igihugu mu 2013.

Mu busatirizi bw'Amavubi haracyarimo icyuho kinini cy'abakinnyi bashobora gutaha izamu

Kugeza ubu rutahizamu u Rwanda rufite rugenderaho ni Jacques Tuyisenge na Medie Kagere na bo bari kubyina bavamo, mu gihe abandi bakiri bato bataratangira kwerekana ikinyuranyo cyo kuba bajya mu kibuga, bakagaragaza ko bakwiye kugenderwaho.

Kugeza ubu rutahizamu wavuga mu bari mu kiragano gishya ufite ibitego byinshi ni Muhadjiri Hakizimana, umaze gutsinda ibitego birindwi mu mikino 30 yakiniye Ikipe y’Igihugu.

Ubusanzwe abakinnyi bahamagarwa mu Ikipe y’Igihugu ni ababa bahagaze neza muri Shampiyona. Iyo badahagaze neza rero bigira ingaruka ku musaruro muri rusange.

Nko muri Shampiyona y’u Rwanda, abanyamahanga ni bo baza ku isonga mu gutsinda ibitego byinshi, byumvikana ko batakifashishwa mu Ikipe y’Igihugu kuko atari Abanyarwanda.

Muri 2015-2016, Hakizimana Muhadjiri yabaye umukinnyi watsinze ibitego byinshi, 2016-2017 aba Usengimana Danny. Kuva icyo gihe abanyamahanga bagabanye imyaka mu gutwara igihembo cy’umukinnyi watsinze ibitego byinshi.

Nko mu mwaka ushize w’imikino, Shaban Hussein Tshabalala ukinira AS Kigali ni we wabaye rutahizamu watsinze ibitego byinshi. Yinjije ibigera kuri 15 muri Shampiyona y’Umupira w’Amaguru mu Rwanda.

Kugeza ubu ba rutahizamu beza b’Abanyarwanda bakizamuka babarizwa mu Ikipe ya APR FC, ariko na yo usanga mu mikino yayo myinshi ibitego byiganza ari iby’abakinnyi bakina hagati no mu bwugarizi kurusha abasatira.

Muri bo harimo Mugisha Gilbert na Mugunga Yves, buri wese yinjije ibitego bitandatu muri shampiyona y’umwaka ushize.

Ntiribara umuto nk’umukuru waribonye! Ahakeneye umwotso nta waharusha abakinnye muri iyi shampiyona cyangwa mu Ikipe y’Igihugu Amavubi.

Mbarushimana Abdu utoza AS Muhanga FC wanakinnye muri Shampiyona y’u Rwanda, avuga ko ikibazo gihari ariko inzira zo kugikemura igoye.

Yagize ati “Ikibazo cya ba rutahizamu cyo kirahari. Nubwo tuvuga ngo u Rwanda ruratera ntiruterwa, ahubwo njye mbona mu mupira w’amaguru duterwa kurusha gutera. Iyo urebye no mu buzima bwa buri wese ashaka ubwirinzi mu bintu byose. Iyo atari ubwirinzi aba ari ubwishingizi.”

“Ni muri urwo rwego rero dufite ikibazo cya ba rutahizamu kuko kubategura bisaba izindi mbaraga zirenze izo twebwe abatoza dufite. Abana benshi baza bakunze kugarira iyo hatabaye ingamba n’amayeri yo kumuhindura no kumukundisha gutaha izamu, yikomereza kugarira.”

Yavuze ko hakenewe ubufasha bw’abayobozi bafite mu nshingano guteza imbere umupira w’amaguru by’umwihariko "Directeur Technique [DT]", bagatanga inama z’uburyo mu makipe hazamurwa abakinnyi b’ibyiciro byose bazafasha igihugu.

Mu myaka itanu ishize Amavubi amaze kwitabira imikino myinshi mpuzamahanga ariko umusaruro uracyakomeje kuba iyanga

Iki kibazo cya DT si we wakigarutseho gusa kuko n’Umuyobozi wa Gasogi United, Kakooza Nkuriza Charles, yagikomojeho mu kiganiro yagiranye na Radio 10.

Yagize ati “Ikintu kibabaje cyane ni uko hari ingaruka zigera ku makipe yose yaba Gasogi United, yaba APR FC ndetse n’izindi, kuba tubaho tutagira Directeur Technique. Aramutse abonetse yagira ijambo no ku batoza bikagira n’ingaruka nziza ku Ikipe y’Igihugu.”

Umutoza wa Police FC wanatoje Amavubi, Mashami Vincent, yavuze ko hakenewe imbaraga nyinshi mu kuzamura abakinnyi bumva neza inshingano zabo mu kibuga.

Yagize ati “Ni ikibazo kitari icy’uyu munsi kuko kimaze igihe kinini. Ntabwo abana b’iwacu bigirira icyizere cyane, batekereza ibiri bube igihe igitego cyagiyemo mbere y’uko kijyamo, bakishima mbere y’uko batsinda [Over Excitement]. Rero iyo urebye usanga gutekereza gutyo bituma nta gufata umwanzuro uhamye bibaho.”

Yavuze ko ikigomba gukorwa nk’abatoza ari uguha amahirwe menshi abakinnyi imbere y’izamu, kugira ngo barimenyere ndetse banimenyereze uburyo bwo kugabanya ibitekerezo byinshi mu gihe babonye amahirwe.

Yakomeje ati “Amakipe akinisha Abanyarwanda na yo kenshi nta bitego abona, kubera iyo mpamvu ndetse no mu Ikipe y’Igihugu bikagenda gutyo. Gutsinda igitego ntibisaba ubwenge bwinshi cyangwa imbaraga nyinshi ahubwo utekereza ibishoboka mu gihe gito kuko n’ubundi mu rubuga rw’amahina uba uri umwami.”

Kubera kubura ibitego bituma n’Ikipe y’Igihugu igarukira hafi mu marushanwa aba yitabiriye ariko kenshi ivamo rugikubita.

U Rwanda ruheruka kwitabira amarushanwa akomeye mu 2004 ubwo rwajyaga mu Gikombe cya Afurika, ku bufasha bwa ba Rutahizamu bayobowe na Jimmy Gatete na Olivier Karekezi.

Jimmy Gatete ni umwe muri ba rutahizamu beza u Rwanda ruheruka. Izina rye rizahora ku mitima ya benshi nk'umwe mu bafashije igihugu kugera mu Gikombe cya Afurika cyabereye muri Tunisia mu 2004
Karekezi Olivier wahagaritse gukinira Amavubi mu 2013, ni umwe muri ba rutahizamu beza u Rwanda rwagize
Mashami Vincent watoje Ikipe y'Igihugu Amavubi avuga ko hakenewe imbaraga nyinshi zo guhindura imyumvire y'abakinnyi b'Abanyarwanda mu kibuga

habumukiza dieudonne

213 Blog posts

Comments