Abamaze kwicwa na COVID-19 mu Rwanda bageze ku 1,308 Soma Usobanukirwe

Mu minsi irindwi ishize icyorezo cya COVID-19 cyahitanye abantu 25, bakaba ari bake cyane ugereranyije n’abapfaga muri buri cyumweru cy’ukwezi kwa Kanama n’iminsi ibanziriza ukwakira. Ni na ko byagenze ku mibare y’abantu batahurwaho iki cyorezo, ariko abakira bo bakomeza kwitongera

Kugeza ku Cyumweru taliki ya 10 Ukwakira 2021, COVID-19 yari imaze guhitana abantu 1,308 kuva muri Werurwe 2020 nk’uko bitangazwa na Minisiteri y’Ubuzima. Abashya cyahitanye ku munsi w’ejo ni 4 barimo abagore batatu n’umugabo umwe.

 

Abo bagore batatu barimo uw’imyaka 72 n’uwa 76 bo mu Karere ka Musanze n’undi w’imyaka 66 wo mu Karere ka Gakenke, mu gihe n’umugabo ari uw’imyaka 86 wo muri Gakenke.

 

Ni mu gihe abamaze gutahurwaho iki cyorezo kuva icyo gihe bageze ku 98,697 barimo 98 babonetse mu masaha 24.

 

Abamaze gukira muri abo babonetse ni 94,943 barimo 178 bakize ku munsi w’ejo bose bakaba bari barwariye mu ngo zabo kuko nta wasezerewe mu bitaro nubwo mu hari 3 bashya babihawe.

 

Minisiteri y’Ubuzima irashimira abaturarwanda ku ruhare bakomeje kugira mu kubahiriza amabwiriza yo kwirinda iki cyorezo harimo no kwitabira kwikingiza. Ku munsi w’ejo abantu bashya 100,371 ni bo bahawe doze ya mbere y’urukingo, mu gihe 201 bahawe doze ya kabiri.

 

Muri rusange abamaze gukingirwa mu Rwanda bageze kuri 2,192,888 barimo abagera kuri 1,695,981 bamaze gukingirwa mu buryo bwuzuye.

 

Imibare itangazwa ku rwego mpuzamahanga igaragaza ko abamaze gutahurwaho COVID-19 kuva yaduka ku Isi basaga miliyoni 238 barimo abasaga miliyoni 215 bamaze gukira n’abandi barenga miliyoni 4.8 imaze gutwara ubuzima.


Mucyo Laurent

476 Blog posts

Comments