Uyu mugabo ashinjwa ibyaha 30 yakoreye ku bagore 21. Ibi byaha yabikoze mu myaka irenga 20 ishize. Uyu musaza w’imyaka 68 yarabihakanye byaha byose mu rukiko rukuru rw’i Los Angeles.

Mu rubanza rwabaye kuri uyu wa Gatatu tariki 25 Kanama, uyu mugabo yashinjwe ko ibi byaha yabikoze hagati yo mu 1996 kugeza mu 2019 abikorera ku bagore bari hagati y’imyaka 15 na 51.

Stuart Goldfarb umuburanira, yatangaje ko arengana kuko ibyaha byose aregwa nta na kimwe yakoze.

Mu byaha ashinjwa harimo kuba yarafashe ku ngufu umugore w’imyaka 19 akamukoresha imibonano mpuzabitsina ku gahato mu 1996 ubwo bari mu ifatwa ry’amafoto, agakorera abandi ihohotera rishingiye ku gitsina barimo uw’imyaka 26 yasambanyirije mu kabyiniro mu 2003 n’undi w’imyaka 17 yasambanyirije iwe mu 2008. Ashinjwa kandi gufata ku ngufu umwana w’imyaka 15 mu 2004.

Uyu mugabo uzagaruka imbere y’ubutabera ku wa 12 Ukwakira, ni umwe mu bamamaye cyane mu ruganda rwa filime zagenewe abakuru mu myaka myinshi yashize. Yatangiye kugaragara muri filime nk’izi guhera mu myaka yo mu 1970.

Yanamamaye muri filime zikomeye no mu biganiro bizwi nka ‘reality TV shows’. Yakorewe filime mbarankuru igaruka ku buzima bwe yitwa ‘Porn Star: The Legend of Ron Jeremy’. Yatawe muri yombi muri Kamena umwaka ushize.