Mashirika ya kutetea haki za binadamu yameonya katika eneo lote la mataifa ya Ethiopia, Kenya na Somalia, mtu mmoja hufariki kila sekunde 48 kutokana na njaa ya muda mrefu inayosababishwa na mzozo, mzozo wa hali ya hewa na kuongezeka kwa gharama ya chakula.


Ripoti ya mashirika ya misaada Oxfam na Save the Children inakadiria kuwa takriban watu milioni 181 kote duniani wanapitia uzoefu viwango vya mzozo wa njaa, huku wanawake wakiathiriwa zaidi.



Mashirika hayo yanasema njaa kali ni kushindwa kisiasa.



Yanakosoa jamii ya kimataifa kwa kuchelewa sana kushugulikia tatizo la njaa na kutozuia dharura "zinazojirudia na kutabirika " .

Jeshi la Ukraine limesema kwamba linalenga kuwaondoa wanajeshi wake waliosalia katika ngome yao ya mwisho ya Mariupol, huku wapiganaji ambao wamekuwa wakizuiliwa kwa siku 82 wakianza kujisalimisha.


Mabasi yameonekana yakiondoka kutoka kiwanda kikubwa cha Azavstal, na baadhi yao yakiwasili katika mji wa Novoazovsk, unaoshikiliwa na wanajeshi wa Russia.



Wanaume waliojeruhiwa wameonekana wakiwa wamelala kwenye vitanda maalum vya kubeba wagonjwa.



Video ambayo imetolewa na wizara ya ulinzi ya Russia imeonyesha wapiganaji wakiondoka kwenye kiwanda hicho, baadhi yao wakiwa wamebebwa kwa vitanda vya wagonjwa, na wengine wakiwa wameinua mikono juu na kukaguliwa na wanajeshi wa Russia.



Russia imesema kwamba wapiganaji 256 wa Ukraine wamejisalimisha, huku 51 wakiwa wamejeruhiwa.



Ukraine imesema kwamba wanajeshi 264, wakiwemo 53 waliojeruhiwa, wameondoka kwenye kiwanda hicho cha chuma na juhudi zinaendelea kuwaondoa wale ambao bado wamo katika kiwanda hicho.



Taarifa ya mkuu wa jeshi la Ukraine imesema kwamba “oparesheni ya kijeshi katika mji wa Mariupol imefanikisha malengo yake.” Na kwamba “kamanda wa juu wa kijeshi ameamrisha wanajeshi walio Azavstal kuokoa maisha ….. waliopigana kulinda Mariupol ni mashujaa.”



Kujisalimisha kwa wanajeshi hao inaonekana kuwa ishara ya kumalizika kwa mapigano makali ya Mariupol, ambapo Ukraine inaamini kwamba maelfu ya watu wameuawa kufuatia mashambulizi ya miezi kadhaa ya wanajeshi wa Russia.



Mji huo umehairbiwa vibaya, na Russia imejitangazia ushindi kwa kuuteka na hivyo kuwezesha Moscow kudhibithi kabisa pwani ya Azov na sehemu za mashariki na kusini mwa Ukraine, ukubwa wa Ugiriki.



Hata hivyo, Russia imeshindwa kabisa kudhibithi sehemu zingine, wanajeshi wake walio katika mji wa Kharkiv, ulio kaskazini mashariki, wakiondoka kwa kiwango kikubwa tangu walipofurushwa kutoka sehemu za kaskazini na sehemu zilizo karibu na Kyiv, mwishoni mwa mwezi March.

Uswidi na Finland zimewasilisha rasmi maombi yake ya kujiunga na nato asubuhi hii.


Katibu mkuu wa Muungano huo Jens Stoltenberg anasema ni " kipindi cha kihistoria, ambacho ni lazima tukitumie", akiongeza kuwa uanachama wa ‘’nchi za Scandnavia ‘ ' utaongeza usalama.



Tangazo la viongozi wa mataifa haya mawili kuhusu azma yao ya kuwasilisha maombi ya uanachama wa muungano wa Nato siku ya Jumapili, limekuja kufuatia uvamizi wa Urusi nchini Ukraine. Bunge la Uswidi lilipiga kura kuunga mkono hatua hiyo, huku Finland ikifanya hivyo jana.



Finland inapana na Urusi katika mipaka yake ya ardhini na nchi kavu. Finland na jirani yake Uswidi ziliendelea kutounga mkono upande wowote katika kipindi chote cha vita baridi kwahiyo maombi yake ya kujiunga na Nato yanaonyesha mabadiliko muhimu katika misimamo yake.



Mchakatowa kujiunga na Nato unaweza kuharakishwa na kuchukua wiki mbili tu, lakini utahitaji uungwaji mkono wa wajumbe wote 30, uidhinishaji ambao unaweza kuchukua hadi mwaka mmoja. Serikali ya Uturuki imekwisha kuelezea upinzani wake.



Rais wa Finland Sauli Niinisto na waziri mkuu wa Uswidi Magdalena Andersson wanatarajia kukutana na Rais wa Mareknai Joe Biden katika Ikulu ya White House Kesho kujadili mada zikiwemo athari za Nato, Usalama wa Ulaya na usaidizi kwa ajili ya Ukraine.

Ukraine na Urusi zimesitisha mazungumzo ya kumaliza vita, wakati mzozo ukizuka kuhusu uwezekano wa kubadilishana wafungwa katika mji uliozingirwa wa Mariupol. Mjumbe mkuu wa Ukraine Mykhailo Podolyak amesema hatua zisingepigwa katika mazungumzo hayo kama Urusi haitaki kuitambua hali ilivyo kwenye uwanja wa mapambano.


Amesema madai ya Urusi kuwa inapambana na Unazi nchini Ukraine hayana msingi wowote. Ameongeza kuwa mpango wa kusitishwa mapigano unaweza kujadiliwa kama tu wanajeshi wa Urusi wataondoka nchini humo na maeneo yote yaliyokamatwa yakombolewe kikamilifu. Naibu waziri wa Mambo ya Kigeni wa Urusi Andrei Rudenko alisema mazungumzo hayo hayatoendelea kwa sababu Ukraine imejiondoa.



Kansela wa Ujerumani Olaf Scholz alizungumza jana kwa njia ya simu na Rais Volodymyr Zelensky. Walikubaliana kuwa sululisho la mazungumzo ya kidiplomasia kati ya Ukraine na Urusi ni muhimu ili kumaliza vita hivyo.

Serikali ya Taliban imekataa wito wa Baraza la Usalama la Umoja wa Mataifa la kuondoa vikwazo vikali vilivyowekwa dhidi ya wanawake wa Afghanistan. Taliban imepuuzia mbali wito huo ikisema hauna msingi.
Baraza la Usalama liliunga mkono kwa kauli moja azimio ambalo liliikosoa serikali ya Taliban kwa kuwawekea vizuizi wasichana na wanawake kupata elimu, kazi za serikali na uhuru wa kutembea tangu walipotwaa madaraka mwaka jana.

Kiongozi mkuu wa Afghanistan Hibatullah Akhundzada pia amewaamuru wanawake kujifunika -- zikiwemo nyuso zao -- wakati wakiwa katika maeneo ya umma, hatua iliyozusha ukosoaji wa kimataifa.

Wizara ya Mambo ya kigeni ya Afghanistan imesema kwa sababu watu wa nchi hiyo wengi wao ni Waislamu, serikali ya Afghanistan inazingatia muongozo wa utamaduni na sharia za kiislamu.